|
La bandira
dla müjiga da Calfosch-Corvara
Sciöche plö o manco dötes
les uniuns insciö à inçe la
müjiga da Calfosch-Corvara orü se
identifiché te na süa bandira. Dl 2000
él gnü damanè Anita Vittur de la
studié fora. La bandira vëgn portada da
trëi portabandira y acompagnëia la müjiga te
dötes les festes de dlijia y de paîsc.
La bandira dla
müjiga da Calfosch-Corvara é nasciüda
ajache an orô mantignì vis, sides tres i corusc co
tres i elemënç rapresentà lassura, i
valurs y les tradiziuns che chësta gran uniun
rapresënta da agn.
La bandira se
presënta sön döes perts desvalies mo liades
por çiche reverda le contegnü: la müjiga y
i dui paîsc che chësta bandira tëgn
adüm.
Da öna na
pert vëigon sön n ble sterch, le medem
corù che la müjiga à inçe tla
troht y tla mondur, le simbol dla uniun, plö avisa la lira cun
l'aurêr, che rapresënta da dagnora incà
bele l'elemënt tle dla tradiziun musicala. Iadedô
él çiamò da odëi i pic dl
crëp plö imponënt de Corvara, le Sassongher,
ponü sön n cöce scraiënt.
Chësc corù é gnü
chirì fora sides ajache an orô
çiamò n iade tó ca n corù
che vëgn dant tla troht co inçe por
mostrè sö la potënza y l'entusiasm ch'al
emanëia. Düt chësc vëgn
incertlè ite da na cornisc dorada che ti fej lerch ti cater
pic ala rafiguraziun di stromënç y a na verjiun
respidlada dla lira.
Sön la pert
rodosa vëgnel rafiguré le simbol che
caraterisëia da dagnora incà le paîsc de
Calfosch: süa dlijia baroca cun iadedô le beliscim
massif dl Sela. Fata ia te n corù ghel é la
scrita: "La müjiga é le lingaz dl cör" y
la bandira ladina. A chësc contest ti fej da cornisc n
valgönes inferiades vedles che dess rapresentè la
potënza y la gran solidité tl tëmp.
La usanza se damana
che vigni bandira ais na tota: Anja Kostner, che sona inçe
pro la müjiga, s'à surantut chësc compit
contribuan inçe al finanziamënt dla bandira.
|
