|
|
L'ann 1969 à la müjiga da Calfosch-Corvara fat le
gran vare da s'arjigné na troht. Le surastant da
inlaôta Rudi Granruaz s'à cruzié de
düt cant. Da Giovani Declara de Costa âl
ciafè na te'vedla troht ch'al â sö sot le
tët. Ala se tratâ de na troht di scizeri, n guant
ch'â plö o manco 200 agn. Insciö
él gnü tut la dezijiun de fà do
chësta troht. Le corù dl samare ê ble y
le corpet cöce cun de te'pici ciüf lassura. Chisc
n'ê nia i corusc dles trohts di paîsc dla Val Badia
o dla Val de Puster mo ai ê sciöche chi che
gnô adorà ti paîsc de Gherdëna.
Çiodî mo?
Sciöche la
storia cunta, fajô le paîsc de Calfosch dan da 200
agn pert dl Comun da Laiun, denanche al gniss costituì le
Comun da Calfosch y plö tert spo chël da Corvara.
Te n pröm
momënt êl gnü lascè
fà da Oswald Pitscheider da Ruac i samari y i
corpeç. I çiapì ê
gnüs cumprà dala firma Hutter da Maran.
Sciöche braia gnôl çiamò tut
na braia foscia scëmpla. Impormò dl 1966
àn lascè fà les braies de coran da na
dita da Porsenù y cumprè i
çialzà dala firma Rabanser da Urtijëi. I
cioi gnô dala firma Kofler da Bornech y les
çialzes ê dötes cantes gnüdes
fates a man da Pia Kostner. Chësta troht costâ
inlaôta 96.000 lires y por la paié jö
ê volontars dla müjiga jüs a
petlè. Cun gran generosité â
düta la popolaziun ofrì sö valch
aladô de sües poscibilitês, y
insciö é la troht stada arjignada por la
mëssa noela de siur Vijo Pitscheider dl Mone da Corvara.
Dl 1993 à
le consëi dla müjiga cun so surastant Konrad Irsara
tut la dezijiun de lascè fà na troht
inçe por les musicontres y les marcatentres. N gran
aiüt é gnü da Marianne Valentin da Issing
che rapresënta la "Arbeitsgemeinschaft für legendige
Tracht". Ala à dè tröc consëis
tl chirì fora le guant nü che respeta la tradiziun
y la cultura locala. Ala à inçe
insigné ite n valgönes ëres a
cujì; chëstes à spo laurè dis
alalungia por arjigné ca i guanç nüs che
é gnüs presentà en gaujiun dl conzert
por la festa dla uma ai 7 de mà dl 1994. Che à
daidé arjigné ca i guanç sot ala
coordinaziun de Cristina Zingerle él stè: Anna
Alfreider, Edith Alfreider, Hilda Alfreider, Dorotea Castlunger,
Antonietta Declara, Hilda Declara, Maria Declara, Martina Irsara, Clara
Kostner, Edith Kostner, Elisabeth Kostner, Frida Kostner, Heidi
Kostner, Lucia Kostner, Pia Kostner, Maria Pescosta, Valeria Pescosta,
Hermine Pinter, Monica Vittur y Eleonora Zingerle. Le çiapel
é gnü lascè fà dala dita
Rizzoli da Balsan y le samare dal sartù da Niederrasen Sepp
Renzler, tres do consëi de Marianne Valentin.
|
