|
A ponsè sceriamënter da mëte sö na müjiga de paîsc àn metü man dl 1927.
Pire Pitscheider d'Alton ê bele n valgügn agn ia en Gherdëna a imparè
da tistler y intratan sonâl inçe pro la müjiga da Urtijëi. Chilò àl imparè
a conësce Giuani Mahlknecht da Palmer y l'à damanè sce al foss gnü ca
Calfosch a le daidé mëte sö na müjiga. Giuani Mahlknecht da Palmer à dit
de scé; sciöche paiamënt orôl ciers da ziplé por ël y por so laurant.
Chisc ciers gnô ofris dal Comun da Calfosch y gnô taià a "Sopiz" dai musicontri.
Ciers gnôl inçe taié por cumprè i stromënç. Giuani Mahlknecht da Palmer
é stè a Calfosch por düt n invern. Tl pröm gnôl fat proa vigni sëra (dui
dis düç adüm y i atri dis despartis) tl local di destödafüch alta ite.
Sonè gnôl en gaujiun dles festes de dlijia. Deache Calfosch ê ploania
y Corvara madër curazia y les gran festes de dlijia gnô porchël tignides
dötes a Calfosch, gnôl madër sonè chilò. En gaujiun de de gran festes
se tolô Giuani Mahlknecht da Palmer n valgügn musicontri da Gherdëna ca
a daidé fora.
Dedô él stè Sepl Posch d'Andrè che s'à surantut la inçiaria da dirighënt
y Giuani Mahlknecht da Palmer é jü ite a San Çiascian. Sepl Posch d'Andrè
à fat le dirighënt çina le 1938.
|
