|
Dl 1945 da d'altonn à la müjiga indô tut sö ofizialmënter süa ativité.
Che insignâ ite i musicontri êl Pire Pitscheider d'Alton y Sepl Posch
d'Andrè. Implü êl siur Giovani Comploj che insignâ da lì les notes. Te
chësc tëmp êl jü plö iadi n valgügn dla müjiga a sonè da bal tl hotel
Sassongher y tl hotel Sport.
Insciö éla jüda inant por n pêr d'agn cun Pire Pitscheider d'Alton sciöche
dirighënt y Giovani Mersa de Iocl che insignâ da jì sön le tact y che
menâ datrai la bachëta. Ai 18 d'aurì dl 1947 él çiamò gnü sonè dala sopoltöra
de mëda Trinele, fomena de Sepl Posch d'Andrè (ex-dirighënt) y dedô él
stè n tëmp de transiziun olache la müjiga à madër sonè dales prozesciuns.
Dl 1955, n ann dan la mëssa noela de siur Sepl Declara, à siur Vincenzo
Frena (curat da Calfosch) indô orü mëte sö la müjiga por chësta ocajiun
sot a süa direziun. Le tëmp ê püch por mëte impé valch mo sot al dit de
siur Vincenzo: "na marçia al mëis", ti ési stà bugn.
Do la mëssa noela é la müjiga çiamò stada por n pêr d'agn sot a süa direziun.
Dl 1959 él indô stè Pire Pitscheider d'Alton y Sepl Posch d'Andrè ch'à
tut tles mans la müjiga mo dl 1960 l'àn indô dada sö.
|
