|
Dl 1972 s'à la müjiga trasferì tla stüa de Pire Pitscheider d'Alton deache
tl ater local messel ti gnì fat lerch ala scola. Dl 1973 éle indô gnü plindernè
por jì tla ciasa dla Cassa Raiffeisen denanche ciafè n local tla scolina
da Corvara.
Dal 1962 al 1973 à Willy Pitscheider d'Alton fat le dirighënt cun n ann
amesaite (1971) sot ala direziun de Pio Pescoller dl Iagher.
Dl 1974 n'à la müjiga nia sonè y dl 1975 àla - cun Rudi Granruaz d'Arlara
sciöche surastant y Willy Pitscheider d'Alton sciöche dirighënt - indô
metü man de sonè le pröm iade en gaujiun dla noza de Konrad Irsara. Dl
1976 él gnü tut pert ala prüma incuntada dles musighes dla Val Badia tignida
a Oies. Dô da chësc iade à la müjiga da Calfosch-Corvara tut pert regolarmënter
a dütes les festes dles musighes dla Val Badia, inçe ala registraziun
dl "Inn Ladin" dl 1991.
Cun l'isté 1978 à Jan Willeit surantut la direziun. Ti agn 1977 y 1978
él gnü pormez tröc jogn ch'à trasformè dassën düt le grup. Te chësc tëmp
éle passè da ca. 20 componënç a plö de 40, cossa che ti à mudé dassën
aspet a chësta uniun. Le sacrifize da ti cumprè a düc le vistimënt y i
stromënç ê sambëgn stè gran, mo al á paié la möia investì ti jogn che
ê da chësc ann inant tres stà dër tröc.
Ai 23 d'aost 1980 à la müjiga albü l'onur da sonè a San Cascian por
le presidënt dla republica Sandro Pertini, en gaujiun dla festa di mënacrëp
sura i 60 agn. Tres dl 1980 à Walter Costa arjunt sciöche pröm musiconter
de chësta müjiga na medaia de prestaziun por le sonè.
Dal 1982 inant à la müjiga podü tignì sü conzerç a Corvara sön le paiun
dan la ciasa de comun, mo dl 1991 ê chësc gnü massa pice - sides deache
al ê gnü pormez musicontri nüs co inçe deache les pauches y les çiampaneles
cumprades pro la bateria adorâ da sëgn inant plö lerch.
Ai 26 d'aost dl 1983 éle stè la sopoltüra dl fondadù dla müjiga, Pire
Pitscheider d'Alton. Dl 1984 é la müjiga passada tles mans de Konrad Irsara
sciöche surastant y Franco Pizzinini sciöche dirighënt. Tl medem ann éle
inçe gnü fat sö n paiun a Calfosch te pineta y dal 1990 à ince la müjiga
n statut. Dl 1996 ti à le Comun dè n local tla scola da Corvara basite,
olache al vëgn dötaurela fat proa.
Tla cronaca dla müjiga ne pôl nia gnì desmentié Silvester Kostner che
ti é tres stè dlungia ala müjiga y ch'à presentè tröc agn alalungia i
conzerç y les festes. Düc se recordarun dessigü cun ci savëi y humor ch'al
ê bun de intratignì n salf plëgn de jënt. Ai 3 de dezëmber dl 1996 él
passè massa adora a miù vita y düc i musicontri le rengrazia de cör por
düt ci che al à fat.
Danter le 1997 y le 1998 él gnü mudè la direziun dla müjiga: dl 1997
à Othmar Costabiei surantut la inçiaria de Konrad Irsara sciöche surastant
y dl 1998 ti à Franco Pizzinini lascè le post a Gerhard Mohr sciöche dirighënt, post che al à çiamo aldedaincö.
Dal 2007 é Alex Rottonara deventè surastant dla müjiga.
|
